Dəniz quldurlarının hücum etdiyi Türkiyə şirkətinə məxsus gəminin dördüncü kapitanı Furkan Yarenlə əlaqə yaradılıb. Furkan Yaren II mühəndis Fərman İsmayılovun öldürüldüyünü, özünün də ayağından yaralandığını qeyd edib. O, gəmi heyətindən 15 nəfərin döyülərək aparıldığını, onunla birlikdə gəmidə qalan iki nəfərdən birinin də yaralı olduğunu bildirib.

Artıq Türkiyənin Nigeriya sahillərində hücuma məruz qalan gəminin heyətinin xilas edilməsi üçün diplomatik kanallar yolu ilə işə başladığı vurğulanır.

Türkiyənin Xarici İşlər naziri Mövlud Çavuşoğlu da Furkan Yarenlə telefonda danışıb və ondan məlumat alıb. Türkiyənin XİN rəhbəri həmçinin gəminin aid olduğun şirkətin idarəçisi Osman Leventə də zəng vurub və başsağlığı verib.

Qeyd edək ki, gəmi hazırda Qabonun Port-Gentil bölgəsinə hərəkət edir və saat 09:00-da limana çatması gözlənilir.

23:25

Nigeriya sahillərində “Motsart” adlı Türkiyə şirkətinə məxsus Liberiya bayrağı altında üzən gəmiyə dəniz quldurları hücum edib.

Avtosfer.az Türkiyə mətbuatına istinadən xəbər verir ki, gəmidə olan 15 nəfər girov götürülüb.

Gəmidə olan azərbaycanlı mühəndis qətlə yetirilib.

Hazırda gəmi limana aparılır.