“Biz Vətən müharibəsindən qalib çıxmış ölkəyik. Hələ də məmurların rüşvət alması məsələsi ilə bağlı məlumatların yayılmasına təəssüflənirəm”.

Bu barədə Oxu.Az-a açıqlamasında “Konstitusiya” Araşdırmaları Fondunun rəhbəri Əliməmməd Nuriyev bildirib.

Onun sözlərinə görə, qanun hər kəs üçün eynidir:

“Cəlilabad Rayon İcra Hakimiyyətinin sabiq başçısı Namiq Zeynalov barəsində istintaq işlər aparılır. Qanun bütün gücü ilə işləməlidir. Hüquq-mühafizə orqanları müvafiq araşdırmalarını davam etdirir. Kim hansı əməli törədibsə, məsuliyyətə cəlb edilib, cəzasını da almalıdır.

Məmurlar tərəfindən rüşvət alması dövlətin qanunlarına hörmətsizlikdir. Prezident İlham Əliyevin apardığı siyasətin məzmununu qavramamağın nəticəsidir”.

“Korrupsiya hallarına yol verən məmurun aşkarlanması və məsuliyyətə cəlb edilməsi alqışlanmalıdır. Onlar bilməlidir ki, cəzadan kənarda qala bilməzlər. Kimliyindən asılı olmayaraq qanun hər kəs üçündür.

Bu həm də digər yüksək rütbəli məmurlar üçün xəbərdarlıq olmalıdır. Bundan lazım olan nəticəni çıxarsınlar. Əgər hansısa məmur köhnə alətlərindən, yəni rüşvət almaqdan əl çəkmirsə, onları bağışlamaq olmaz. İstənilən baş vermiş əməllər ciddi araşdırılmalıdır. Cəzanın ən sərt üzünü görməlidirlər”, - deyə o bildirib.