Həbsxanalar dolduğundan məhbuslar polis kameralarına yerləşdiriləcək

İngiltərə və Uelsdə həbsxanalarda cəmi 800-dən az boş yer qaldığı üçün hökumət məhbusları polis kameralarına yerləşdirmək qərarına gəlib.

Avtosfer.az “Azərtac”a istinadla xəbər verir ki, bu addım sentyabr ayında həyata keçirilmiş erkən azadlıq proqramına baxmayaraq atılır. Həmin proqram çərçivəsində cəzasının ən azı 40 faizini çəkmiş minlərlə məhbus vaxtından əvvəl sərbəst buraxılmışdı. Hökumət həbsxanaların yenidən dolması səbəbindən təcili tədbir kimi polis bölmələrində məhbusların saxlanılmasını nəzərdə tutan fövqəladə rejimi aktivləşdirib.

“Operation Safeguard” (Təhlükəsizlik Əməliyyatı) adı altında həyata keçirilən bu plan Milli Polis Rəisləri Şurası və həbsxana xidməti arasında imzalanmış razılaşmaya əsasən, həbsxanalar dolduğu halda məhbusların müvəqqəti olaraq polis kameralarına yerləşdirilməsinə imkan verir. Bu sistem ötən ilin may ayında bir neçə ay ərzində tətbiq olunmuşdu.

Hazırda İngiltərə və Uelsdə 87 min 556 məhbus var və cəmi 800-dən az boş həbsxana yeri qalıb. Bu, sentyabr ayından bəri qeydə alınan ən yüksək göstəricidir. Həmin vaxt hökumətin erkən azadlıq tədbirləri minlərlə məhbusun cəzasının 40 faizini çəkdikdən sonra buraxılmasına səbəb olmuşdu.