“Paşa Bank” “Toboil”i məhkəməyə verdi - 3 milyonluq borc

“Paşa Bank” “Toboil” yanacaq doldurma məntəqələri barəsində məhkəməyə müraciət edib.

“Qafqazinfo”nun məlumatına görə, şirkətin bank qarşısında 3 milyon manata yaxın kredit borcu var. Borc altı fərqli müqavilə üzrə yaranıb. Bunların arasında ən yüklü məbləğ bir müqavilə üzrə olan 2,6 milyon manatlıq müqavilədir.

Qeyd edilən kreditlər ödənilmədiyi üçün bank şirkət barəsində iddia qaldırıb. İddiaya Bakı Kommersiya Məhkəməsində hakim Aytən Əliyevanın sədrliyi ilə baxılır.

İş üzrə “Toboil” MMC ilə yanaşı, şirkətin rəhbəri Bəxtiyar Əzizli və daha 4 nəfər də cavabdeh kimi tanınıb. Həmin şəxslər kredit üzrə ipoteka qoyan şəxslərdir.

Qeyd edək ki, Bəxtiyar Əzizli iş adamı kimi tanınır. O, “Toboil”, “Neftgen” şirkətlərinin təsisçisidir.