Seula uçan təyyarə poverbanka görə İstanbula qayıtdı

İstanbul-Seul reysini həyata keçirən “Asiana Airlines”ə məxsus “Boeing 777” tipli sərnişin təyyarəsi yarı yoldan geri qayıdıb.

Avtosfer.az Türkiyə mediasına istinadən xəbər verir ki, buna təyyarədə sərnişinlərdən birinə məxsus poverbankın oturacağın arasına düşməsi səbəb olub.

Təyyarə təhlükəsizlik məqsədilə İstanbul Hava Limanına qayıtmalı olub və yerli vaxtla saat 23:25-də uğurla eniş edib.

Bildirilib ki, poverbankların daxilində litium plitə mövcuddur və oturacaq motorunun hərəkət etməsi ilə o zədələnə və yana bilər. Bu isə hava nəqliyyatı vasitəsində ciddi fəsadların baş verməsinə, hətta partlayışa səbəb ola bilər.

Qeyd edək ki, ötən il Cənubi Koreyada göyərtəsində 170 sərnişin və 6 ekipaj üzvü olan təyyarədə poverbank partlayıb və yanğın baş verib. Bundan sonra Beynəlxalq Aviasiya Təşkilatı şirkətlərə sərnişinlərin təyyarələrə poverbankla daxil olmasını məhdudlaşdırmağı tövsiyə edib.