Qaradağda dairəyə "protiv" girən sürücülər SAXLANILDI - İzahatda görün nə yazıblar - VİDEO

Paytaxtın Qaradağ rayonu ərazisində sürücülərin təhlükəli vəziyyət yaratması ilə bağlı bir neçə gün öncə videogörüntü dərc etmişdik. Avtosfer.az xəbər verir ki, Lökbatan qəsəbəsi, "Qobu Park-3" yaşayış kompleksinin girişindəki dairədə 99-OT-265 qeydiyyat nişanlı "Ravon" markalı və 10-HU-172 qeydiyyat nişanlı "Renault" markalı avtomobilin sürücüləri kobud qayda pozuntusu törədiblər. Onlar dairəyə daxil olmadan əks istiqamətdə hərəkət edərək digər sürücülərə təhlükəli anlar yaşadıblar.

Yayılmış görüntüdən sonra hər iki sürücü saxlanılıb. Bu barədə Avtosfer.az-a Qaradağ rayon Dövlət Yol Polisi Şöbəsindən məlumat verilib. Bildirilir ki, hər iki sürücü saxlanılaraq Dövlət Yol Polisi Şöbəsinə dəvət olunaraq izahatları alınıb. Sürücülərdən biri izahatında həmin vaxt dayısının dünyasını dəyişdiyini, digər sürücü isə anasının səhhətində problem yarandığından fikirli olduğu üçün qayda pozduğunu bildirib. Hər iki sürücü səhv hərəkətə yol verdiyini etiraf edib və gələcəkdə belə hallara yol verməyəcəklərini bildiriblər.

Onların barəsində İnzibati Xətalar Məcəlləsinin 327.2-ci maddəsi ilə 3 bal 100 manat məbləğində cərimə tətbiq edilib.

Fərid