Maşının qabağına keçən kuryer az qala qəzaya səbəb olacaqdı - VİDEO

Paytaxtın Hüseyn Seyidzadə küçəsində, “Memar Əcəmi” metrostansiyasının yaxınlığında qayda pozan sürücü kameraya düşüb.

Avtosfer.az-ın məlumatına görə, hadisə noyabrın 3-də saat 23:09 radələrində qeydə alınıb.

Kadrlardan görünür ki, “Wolt” çatdırılma şirkətinin kuryeri ara küçəyə dönmək məqsədilə hərəkətdə olduğu zolaqdan qəfil sola manevr edərək digər zolaqda hərəkət edən avtomobilin qarşısında dayanır. Nəticədə o, görüntünü qeydə alan avtomobilin sürücüsü üçün qəza şəraiti yaradır.

Xoşbəxtlikdən, sürücü vaxtında reaksiya verərək toqquşmanın qarşısını alır.

Qeyd edək ki, qanunvericiliyin tələblərinə əsasən, sürücü hər hansı manevr etməzdən əvvəl onun təhlükəsiz olmasına əmin olmalı, digər hərəkət iştirakçılarına maneə və ya təhlükə yaratmamalıdır.

Nərmin