Sürücü iki kəmər taxdı; DYP cərimələdi - qanun nə deyir? - FOTO

Bakıda təhlükəsizlik kəmərindən istifadə edən sürücü kamera vasitəsilə cərimələnib. Bu barədə sürücü “Facebook” hesabında paylaşım edib. Avtosfer.az xəbər verir ki, Rauf Niftəliyev adlı sürücü idarə etdiyi “VAZ” markalı avtomobillə paytaxt küçələrinin birində hərəkətdə olarkən xüsusi texniki vasitənin köməkliyiylə barəsində protokol tərtib olunub. Avtomobilin təhlükəsizlik kəməri 4 nöqtəli olduğu və fərqli göründüyü üçün kamera sürücünü kəmərdən istifadə etmədiyi kimi qeydə alıb. Sürücü ona yazılan cərimənin qanunsuz olduğunu və bu barədə rəsmi şikayət etdiyini bildirib.

Sonradan quraşdırılan 4 nöqtəli kəmərə görə sürücü cərimələnə bilərmi?

Məsələ ilə bağlı Avtosfer.az-a açıqlama verən hüquqşünas Ərşad Hüseynov bildirib ki, bizim milli qanunvericiliyimizdə təhlükəsizlik kəmərinin hansı formada olması ilə bağlı heç bir tələb yoxdur. “Yol hərəkəti haqqında” qanuna görə sürücü və sərnişin barəsində belə bir tələb var ki, onlar konstruksiyada nəzərdə tutulmuş təhlükəsizlik kəmərini bağlamalıdırlar. Əgər kimsə sürücünün sonradan quraşdırdığı 4 nöqtəli kəmərin düzgün olmadığını, tələblərə cavab vermədiyini iddia edirsə, bunu yalnız ekspertiza yolu ilə müəyyən etməlidir.

Təbriz