Dörd avtomobilin iştirakı ilə qəza; 7 nəfər xəsarət alıb - FOTO

Rusiyanın Novosibirsk əyalətində 4 nəqliyyat vasitəsinin iştirakı ilə yol qəzası baş verib. Avtosfer.az xəbər verir ki, insident aprelin 25-də axşam saatlarında “Sovet” şosesində qeydə alınıb. Bu barədə “News.ngs.ru” portalı məlumat yayıb.

Məlumata görə, 36 yaşlı sürücü idarə etdiyi “BMW X6” markalı avtomobillə hərəkətdə olarkən, 1979-cu il təvəllüdlü qadının idarə etdiyi “Nissan Sunny” markalı maşınla toqquşub.

Zərbənin təsirindən “BMW” “Toyota Fielder”ə, “Nissan” isə “Hyundai Solaris”ə çırpılıb.

Qəza nəticəsində ümumilikdə 7 nəfər xəsarət alıb. Yaralılar, hadisə yerinə çağırılan təcili tibbi yardım briqadasının köməkliyi ilə xəstəxanaya çatdırılıblar. “Toyota”da olan 2008-ci ildə anadan olmuş oğlan sərnişininin vəziyyətinin ağır olduğu bildirilir. O, reanimasiya şöbəsinə yerləşdirilib.

Polis hadisə ilə bağlı araşdırmalara başlayıb.

Namiq Musayev