Qarlı yolda yüzdən çox avtomobil toqquşub

İsveçin Uppsala şəhərində yüzdən çox avtomobilin iştirakı ilə iki böyük yol-nəqliyyat hadisəsi baş verib.

Avtosfer.az “Azərtac”a istinadən xəbər verir ki, qəzalar nəticəsində çoxlu sayda insan xəsarət alıb, onlardan dördünün vəziyyəti ağırdır.

İlk toqquşma bir neçə avtomobilin iştirakı ilə səhər saatlarında baş verib. Bu qəzada 20-dən çox zərərçəkən Uppsala Akademik Xəstəxanasına çatdırılıb, lakin ciddi xəsarətlər barədə məlumat verilməyib.

Uppsaladakı Səhiyyə və Tibbi Xidmətlər Departamentinin direktoru Mikael Kyöler deyib:

“Həm Uppsala Akademik Xəstəxanasında, həm də Ençöpinq Xəstəxanasında yüksək hazırlıq vəziyyəti elan edilib”.

Daha sonra 95 avtomobilin iştirakı ilə böyük qəza baş verib. Hadisə yerinə təcili yardım xidmətləri, o cümlədən tibbi helikopterlər gəlib.

Polis Departamentinin sözçüsü Stefan Larsson deyib:

“Bu, dəhşətli mənzərədir. Əzilmiş maşınlar səpələnmiş çubuqlar kimi ətrafa səpələnib”.

Hökumət ictimaiyyətə mühüm mesaj verib və sürücüləri yolların təhlükəli hissələrində maşın sürməkdən çəkinməyə çağırıb. Bölgədə böhran qərargahı da yaradılıb. Polisin məlumatına görə, hava şəraiti ekstremaldır və yollar çox sürüşkəndir. Bəzi sürücülərin diqqətini hadisə yerinə yönəltməsi nəticəsində baş verən yeni qəzalar barədə də xəbərlər daxil olmaqda davam edir. Meteoroloqlar qarın axşama kimi yağacağını, bundan sonra onun paytaxt Stokholma doğru hərəkət edəcəyi barədə xəbərdarlıq edirlər.