Qırğızıstanda ağır yol qəzası: 7 ölü, 6 yaralı - FOTO

Qırğızıstanın Cəlal-Abad əyalətində iki nəqliyyat vasitəsinin iştirakı ilə ağır yol qəzası baş verib. Avtosfer.az xəbər verir ki, insident martın 4-də gecə saatlarında Bişkek – Oş avtomagistralının 493-cü kilometrliyində qeydə alınıb. Bu barədə ölkənin Fövqəladə Hallar Nazirliyinin rəsmi saytında məlumat yayımlanıb.

Məlumata görə, “Mercedes Vito” markalı mikroavtobus “Honda Jazz” markalı minik avtomobili ilə toqquşub. Zərbənin təsirindən hər iki maşın deformasiyaya uğrayıb. Nəticədə 7 nəfər dünyasını dəyişib, daha 6-sı isə müxtəlif dərəcəli bədən xəsarətləri alıb. Yaralılar, təcili tibbi yardım briqadasının köməkliyi ilə Şamalda-Say şəhərində yerləşən xəstəxanaya çatdırılıblar.

Hazırda qəzanın baş vermə səbəbləri və ölənlərin şəxsiyyətləri müəyyənləşdirilir.

Namiq Musayev