Tanınmış aktrisa avtomobil qəzasında öldü

“Qodzilla Konqa qarşı” və “Qodzilla Konq: Yeni İmperiya” filmlərində Jia obrazı ilə tanınan gənc aktrisa Keyli Hottl 18 yaşında vəfat edib.

Avtosfer.az xəbər verir ki, eşitmə qüsurlu aktrisanın ABŞ-nin Merilend ştatında baş verən yol qəzasında ağır yaralandığı və xəstəxanada həyatını itirdiyi bildirilib.

Faciəli xəbəri Keylinin atası Coşua Hottl açıqlayıb. O, qızının ölüm xəbərini sosial mediada Amerika İşarət Dili (ASL) ilə yayımladığı duyğusal video vasitəsilə paylaşıb.

Keyli Hottl dünya şöhrətini 2021-ci ildə ekranlara çıxan “Qodzilla Konqa qarşı” filmində canlandırdığı Jia obrazı ilə qazanmışdı. O, filmdə Kinq Konqla işarət dili vasitəsilə ünsiyyət quran kar qız rolunu oynayaraq tamaşaçıların böyük rəğbətini qazanmışdı.

Gənc aktrisa 2024-cü ildə yayımlanan “Qodzilla Konq: Yeni İmperiya” filmində də eyni obrazı canlandırıb.

Hottlın performansı təkcə tamaşaçılar tərəfindən deyil, kino sənayesi tərəfindən də yüksək qiymətləndirilib. O, hər iki filmdəki roluna görə “Ən yaxşı gənc aktyor performansı” nominasiyasında Saturn mükafatına namizəd göstərilib.

Keyli Hottl eşitmə qüsurlu aktyorların Hollivudda daha çox görünməsinə töhfə verən gənc sənətçilərdən biri hesab olunurdu. O, eşitmə qüsurlu insanların olduğu bir ailədə böyüyüb və aktrisalıq karyerasına reklam çəkilişləri ilə başlayıb.

Onun Jia obrazı xüsusilə kar insanların kino dünyasında təmsil olunması baxımından mühüm addım kimi qiymətləndirilirdi.