Vanda mikroavtobus qar uçqununun altında qaldı: azı 5 ölü, 7 yaralı - FOTO

Türkiyənin Van vilayətində mikroavtobusun qar uçqununun altında qalması nəticəsində azı 5 nəfər ölüb, daha 7-si isə xəsarət alıb. Avtosfer.az xəbər verir ki, insident Van – Bağçasaray avtomagistralının 33-cü kilometrliyində qeydə alınıb. Bu barədə “Anadolu” agentliyi məlumat yayıb.

Məlumata görə, şosedə hərəkətdə olan mikroavtobus, Bağçasaray ərazisində üzərinə qar kütləsi düşüb.

Əyalətin icra başçısı Məhmət Əmin Bilməzin sözlərinə görə, əməliyyat-axtarış tədbirləri nəticəsində 7 nəfər xilas edilib. Təəssüflər olsun ki, xilasedicilər qarın altından daha 5 nəfərin meyitini aşkarlayaraq oradan çıxarıblar.

Bildirilir ki, hələ azı 2 nəfərin uçqun altında qaldığı ehtimal edilir.

Əməliyyat-axtarış tədbirləri davam etdirilir.

Namiq Musayev