Yük maşını bazarda satıcıların üzərinə aşdı; 5 ölü, 5 yaralı - FOTO

Vyetnamda yük maşınının bazarda satıcıların üzərinə hərəkət etməsi nəticəsində 5 nəfər ölüb, 5-i isə xəsarət alıb. Avtosfer.az xəbər verir ki, hadisə iyunun 13-də səhər saatlarında Daknonq əyalətində qeydə alınıb. Bu barədə “VN Express” nəşri məlumat yayıb.

Məlumata görə, iki yük maşınının toqquşmasından sonra nəqliyyat vasitələrindən biri sürücünün idarəetməsindən çıxaraq əvvəlcə yol kənarında park edilmiş motosikletlərə çırpılıb, daha sonra isə bazarın içərisinə hərəkət edərək aşıb və bir neçə satıcını əzib.

Bildirilir ki, 3 nəfər hadisə yerində dünyasını dəyişib, 7 nəfər isə xəstəxanaya çatdırılıb. Daha 2 nəfər isə orada dünyasını dəyişib.

Ölənlərin hamısı 43-60 yaş arası qadın satıcılardır.

Dakmil dairəsinin sədrinin sözlərinə görə, qəzanın yük avtomobilinin təkərinin boşalması səbəbindən baş verdiyi ehtimal edilir.

Hazırda sürücü saxlanılıb, ondan narkotik və sərxoşluq testi üçün nümunələr götürülüb.

Namiq Musayev