Yük maşını qəzaya uğradı: 120 min yumurta yola dağıldı - VİDEO

Yük maşını qəzaya uğradı, on minlərlə yumurta yola dağıldı. Avtosfer.az atv.az-a istinadən xəbər verir ki, Çinin Dzianqsu vilayətində baş verən yol nəqliyyat hadisəsi ortaya qəribə mənzərə çıxarıb. Quşçuluq fabrikindən yola çıxan yük maşınının qəzaya uğraması  120 min yumurtanın da qırılmasına yol açıb.

Tanınmaz hala düşən magistralda avtomobillərin hərəkəti dərhal dayandırılıb. Yolun yumurtadan təmizlənməsi üçün əraziyə bələdiyyə işçiləri  və polislər cəlb olunub. 100 mindən çox yumurtanın yola səpələndiyi ərazidə nəqliyyatın hərəkətini bərpa etmək saatlarla vaxt aparıb.

Qəzanın sevindirici tərəfi isə  olayda tələfatın qeydə alınmamasıdır. Bununla belə yük maşınının sürücüsü səbəb olduğu qəza və fəsada görə cavab vermək üçün hakim qarşısına çıxarılacaq. Hadisə baş verən vaxt yük maşınında 3 nəfər olub. Kuzov aşarkən yumurta səbətlərinin arasında olan fəhlələrin də ciddi xəsarət almadığı bildirilir.