Bu şəxslərin əməkhaqqı fərqli hesablanacaq

Market və mağazalarda çalışan işçilərin həftəsonu və bayram günlərində işləməsi əməkhaqqının hesablanması ilə bağlı tez-tez müzakirələrə səbəb olur. Xüsusilə də şənbə və bazar günləri işə çıxan əməkdaşlara maaşın ikiqat ödənilib-ödənilməməsi bir çoxları üçün maraq doğuran məsələlərdəndir.

Bəs qanunvericiliyə görə bu günlərdə çalışan işçilərə əməkhaqqı hansı hallarda ikiqat hesablanmalıdır?

Avtosfer.az-ın məlumatına görə, mövzu ilə bağlı hüquqşünas Tağı Hüseynov "Konkret.az"a bildirib ki, qanunda əməkhaqqının ikiqat ödənildiyi günlər mövcuddur.  Onun sözlərinə görə, bunlara iş günü hesab olunmayan bayram, hüzn, Seçki Məcəlləsinə uyğun olaraq səsvermə və referendum günləri daxildir.

Hüquqşünas qeyd edib ki, qanunvericilikdə şənbə və bazar günləri birbaşa olaraq ikiqat ödəniş edilən günlər kimi göstərilmir. Bu məsələdə əsas məqam işçinin əmək müqaviləsində müəyyən olunan iş və istirahət günləridir.

“Əgər işçinin əmək müqaviləsində istirahət günləri şənbə və bazar kimi göstərilibsə və işçi həmin günlərdə işə cəlb olunursa, bu halda onun əməkhaqqı ikiqat hesablanmalıdır. Lakin müqavilədə işçinin istirahət vaxtı fərqli tarixlər kimi müəyyən olunubsa, həmin vaxtda işlədiyi halda əməkhaqqı ikiqat ödənilməlidir. Çünki işçi öz istirahət günündə işə cəlb olunmuş sayılır”, – deyə hüquqşünas vurğulayıb.