Formula 1 avtomobillərinin “komfortu” - FOTO

Avtomobil sürücülərinin könlündən bir dəfə də olsa idman avtomobili sürmək keçib. Formula 1 avtomobilləri isə bütün yarış maşınlarının “şahı” hesab olunur? Bəs bu avtomobillərdə Avropa və Yaponiyanın standart modellərindəki kimi komfort və rahatlıq varmı? 

Avtosfer.az xəbər verir ki, Formula 1 avtomobilinə verilən əsas tələblər yolla yaxşı kontaktda olmaq, sürət və mövsüm sonunadək davam gətirməkdir. Komfort ikinci plandadır. Formula 1 bolidinin salonuna cəmu 1 nəfər yerləşir. Pilot ayaqlarını uzatmış şəkildə oturur. Oturacaq isə pilotun oturma qaydasına əsasən fərdi şəkildə hazırlanır. Yəni, UAZ avtomobilindəki kimi F1 bolidlərində də oturacaq tənzimlənmir, şassiyə sərt şəkildə bərkidilir. 

İsti hava isə pilotlar üçün ayrı əziyyətdir. Kondisionerin olmadığı bu avtomobillərdə salonda temperaturun 40 dərəcə olması adi haldır. İsti ərəb ölkələrində yay mövsümündə isə pilotun ayağı altında temperatur bəzən 60 dərəcəyə çatır. 

F1 avtomobillərində ən narahatlıqverici məqamlardan biri də səsdir. Mühərrik və aerodinamik küylər bir bininə qarışdıqda səsin şiddəti qırıcı təyyarəyə bərabər olur.
Pilotlar səs və istidən qorunmaq üçün xüsusi kombinezon və dəbilqədən istifadə edirlər.

Vüqar Yaşaroğlu