Yeni dəmir yolu layihəsi region iqtisadiyyatı üçün güclü təkan olacaq

Türkiyənin Ərzurum və Rize vilayətləri arasında yeni dəmir yolu layihəsi “İyidere” logistika mərkəzi istiqamətində filialın qolunun tikintisini nəzərdə tutur, bu da Zəngəzur dəhlizinin Qara dəniz sahilinə çıxışını təmin edəcək.

Avtosfer.az “Azərtac”a istinadən xəbər verir ki, bu barədə Rize Qara dəniz vilayətinin Ticarət və Sənaye Palatasının rəhbəri Şaban Aziz Karaahmetoğlu müvafiq açıqlama ilə çıxış edib.

Onun sözlərinə görə, məsələ artıq Türkiyə Dövlət Dəmir Yollarının rəhbərliyi ilə müzakirə olunub.

“Erzurum-Rize dəmir yolu alternativ Erzincan-Trabzon layihəsindən 210 kilometr qısadır. Relyef şəraiti yolun çəkilməsi üçün daha əlverişlidir. Layihə artıq nəzərdən keçirilir. Ümid edirəm ki, yaxın 4-5 ildə bu təşəbbüs həyata keçiriləcək”, - deyə palata rəhbəri bildirib.

Türkiyənin nəqliyyat və infrastruktur naziri Əbdülkadir Uraloğlu daha əvvəl bildirmişdi ki, logistika mərkəzi - Rize vilayətindəki “İyidere” limanı 2025-ci ilin sonuna kimi fəaliyyətə başlayacaq və bu, region iqtisadiyyatı üçün güclü təkan olacaq.