Yasamalda yol polisi qayda pozanları cərimələdi - "Təmiz hava" - VİDEO

Yasamal RPİ DYP Şöbəsinin əməkdaşları Ekologiya və Təbii Sərvətlər Nazirliyinin nümayəndələri ilə birgə rayon ərazisində avtomobillərdən atmosferə atılan zərərli tullantıların ətraf mühitə və insan sağlamlığına vurduğu zərərin qarşısının alınması istiqamətində tədbir həyata keçirilib.

Avtosfer.az xəbər verir ki, "Təmiz hava" aylığı ilə əlaqədar keçirilən tədbirlər zamanı avtonəqliyyat vasitələrinin texniki sazlığının daim diqqət mərkəzində saxlanılmasının əhəmiyyəti barədə sürücülərlə maarifləndirici söhbətlər aparılıb.

Tədbir zamanı avtomobili zərərli qazları normadan artıq ixrac edən sürücülər barəsində İnzibati Xətalar Məcəlləsinin müvafiq maddəsi ilə protokol tərtib olunub. Bəzi sürücülərə xəbərdarlıq edilib.

Sürücülərin diqqətinə çatdırılıb ki, istifadələrində olan avtonəqliyyat vasitələrini texniki cəhətdən saz vəziyyətdə istismar etsinlər.

Xatırladaq ki, ölkə ərazisində “Təmiz hava" aylığı ilə bağlı tədbirlər davam etdirilir.

Səfər