“Audi” şirkətinin mənfəəti gözlənilmədən artıb

Ötən il “Audi” avtomobil istehsalçısının mənfəətində artım qeydə alınıb.

Avtosfer.az xəbər verir ki, şirkət vergi sonrası hesabatında 4,6 milyard avro qazanc əldə etdiyini açıqlayıb. Bu isə əvvəlki illə müqayisədə 10 faiz artım deməkdir. Buna baxmayaraq, avtomobil istehsalçısının əməliyyat mənfəətində 14 faizlik azalma müşahidə olunub.

Bir çox Avropa şirkəti kimi “Audi” də ABŞ tarifləri, karbon qazı tənzimləmələri və Çində elektromobillər üzrə rəqabətin güclənməsi səbəbindən çətinliklərlə üzləşib. Almaniyanın avtomobil nəhəngi 2027-ci ilədək 6 min iş yerini ixtisar etməyi planlaşdırdığını elan edib və bu prosesin böyük hissəsi artıq icra olunub. Bununla, şirkət cari ildə əməliyyat mənfəətini artırmağı və gəlirləri sabit saxlamağı hədəfləyir.