Avtomobillərin öz-özünə yanması halları artıb - Usta səbəbləri AÇIQLADI

Son günlərdə ölkədə avtobus və şəxsi avtomobillərin öz-özünə alışması və yanması halları artıb. Sosial şəbəkələrdə yayılan görüntülər və bəzi xəbərlər vətəndaşlarda narahatlıq yaradıb. Avtosfer.az-ın məlumatına görə, mövzu ilə bağlı "redaktor.az"a fikirlərini bildirən avtomobil ustası Əziz Abbasov bildirdi ki, avtomobillərin öz-özünə alışmasının başlıca səbəbləri arasında bir neçə amil diqqət çəkir:

"Əvvəla, elektrik sistemindəki nasazlıq və ya köhnəlmiş kabellər qısaqapanmalara səbəb olaraq yanğın riskini artırır. Eyni zamanda yanacaq sistemindəki kiçik sızmalar, xüsusilə borularda və rezervuarlarda yaranan çatışmazlıqlar, mühərrikin yüksək istiliyi ilə təmasda olduqda yanğın təhlükəsini daha da gücləndirir. Bununla yanaşı, avtomobillərə quraşdırılan qeyri-sertifikatlaşdırılmış və standartlara uyğun olmayan əlavə avadanlıqlar da elektrik sistemində problemlər yarada bilər və yanğın riskini artırır. Mühərrikdə yağ sızmaları da ciddi təhlükə mənbəyidir; sızan yağ yüksək temperaturla təmasda olduqda yanmağa səbəb ola bilər. Nəhayət, aşırı qızma və ventilyator sistemindəki nasazlıqlar mühərrikin düzgün soyudulmasını əngəlləyir, bu da avtomobilin öz-özünə alışmasına gətirib çıxara bilər. Bu səbəblərə görə, avtomobil sahibləri vaxtaşırı texniki baxışdan keçməli və hər hansı bir problem aşkarladıqda dərhal tədbir görməlidirlər".