Azərbaycan Türkiyədən avtomobil sənayesi məhsullarının idxal xərcini 23 faiz artırıb

Bu ilin yanvar-aprel aylarında Azərbaycan Türkiyədən 32,037 milyon ABŞ dolları dəyərində avtomobil sənayesi məhsulları idxal edib.

Avtosfer.az "Report"a istinadən xəbər verir ki, bu, ötən ilin eyni dövrü ilə müqayisədə 22,9 % çoxdur.

Təkcə apreldə isə Türkiyə Azərbaycana 14,279 milyon ABŞ dolları dəyərində avtomobil sənayesi məhsulları ixrac edib ki, bu da 1 il əvvələ nisbətən 2,2 dəfə çoxdur.

4 ayda Türkiyənin avtomobil sənayesi məhsulları ixracının ümumi dəyəri illik müqayisədə 8,9 % artaraq 13,748 milyard ABŞ dollarına, apreldə isə 22,7 % artaraq 3,855 milyard ABŞ dollarına çatıb.

Türkiyədən ən çox bu məhsulların idxalını Almaniya 2 milyard 202,606 milyon ABŞ dolları (1 il əvvələ nisbətən 9,2 % çox), Fransa 1 milyard 686 milyon ABŞ dolları (15,8% çox) və İtaliya 1 milyard 268 milyon ABŞ dolları (24 % çox) dəyərində həyata keçirib.