Azərbaycanda avtomobillərin təmiri bahalaşdı

2015-ci ilin iyul ayında sənaye məhsullarının istehsalçı qiymətləri əvvəlki ayla müqayisədə 6,1%, o cümlədən mədənçıxarma sənayesi üzrə 7,1%, emal sənayesi üzrə isə 0,9% azalıb. Avtosfer.az xəbər verir ki, bu barədə Dövlət Statistika Komitəsindən (DSK) bildirilib. Komitənin məlumatına görə, cari ilin iyul ayında mədənçıxarma sənayesi bölməsində istehsalçı qiymətlərində xam neft və təbii qaz hasilatı üzrə 7,1%, metal filizlərinin hasilatı üzrə 2,0%, daş, qum, çınqıl, duz və digər mədənçıxarma sənayesi məhsullarının hasilatı üzrə isə 1,7% azalma müşahidə olunub.

İyul ayında emal sənayesi bölməsində istehsalçı qiymətləri rezin və plastik kütlə məmulatlarının istehsalı üzrə 3,9%, kimya sənayesi üzrə 2,1%, metallurgiya sənayesi üzrə 2,0%, neft məhsullarının istehsalı üzrə 1,6%, maşın və avadanlıqların istehsalı üzrə 1,5%, ağac emalı və ağacdan məmulatların istehsalı üzrə 0,5%, toxuculuq sənayesi və poliqrafiya fəaliyyəti üzrə 0,2% aşağı düşüb.

Bundan əlavə, maşın və avadanlıqların quraşdırılması və təmiri üzrə 8,5%, kompüter və digər elektron avadanlıqların istehsalı üzrə 2,4%, maşın və avadanlıqlardan başqa hazır metal məmulatlarının istehsalı üzrə 1,1%, içki istehsalı üzrə 1,0%, geyim istehsalı üzrə 0,9%, mebel və qida məhsullarının istehsalı üzrə 0,2%, tikinti və tütün məmulatlarının istehsalı üzrə 0,1% yüksəlib.

Qeyd edək ki, ay ərzində elektrik enerjisi, qaz və buxar istehsalı, bölüşdürülməsi və təchizatı, su təchizatı, tullantıların təmizlənməsi və emalı bölmələri üzrə isə heç bir dəyişiklik müşahidə olunmayıb.