Bakı-Qazax yolunda sürücülər üçün təhlükə

Avtobus, "KamAZ", VAZ markalı avtomobillər Bakı-Qazax avtomagistralının kənarını "bəzəyir". İrili-xırdalı yük, sərnişin maşınları, sanki, avtosərgini xatırladır. Satışa çıxarılan iritutumlu maşınlar yola çox yaxın dayanırlar. Avtosfer.az regiontv-yə istinadən verilən xəbərə görə, magistral yolun Tovuz, Ağstafa rayonlarının ərazisindən keçən hissəsində satışı həyata keçirilən bu nəqliyyat vasitələri uzun müddət burada qalaraq sürücülər üçün təhlükə törədir.

Gecə saatlarında daha çox problem yaradan bu cür avtomobillər ani diqqətsizliyə səbəb olur ki, bu zaman da yol qəzalarının baş verməsi ehtimalı artır. Sürücülər iritutumlu avtomobillər üçün müvafiq yerlər ayrılmasını, satışın da orada təşkil olunmasını tələb edirlər.