Belə avtomobil sürənlərin diqqətinə -PULSUZDUR - VİDEO

Son dövrlər ölkəmizdə də artıq elektrik enerjisi ilə işləyən avtomobillərdən istifadə edilməyə başlanılıb. Elə bu səbəbdən bu avtomobillərin enerji ilə təmin olunması üçün elektrik məntəqələri də yaradılır. İlk belə enerjidoldurma məntəqəsi artıq Heydər Əliyev Mərkəzinin parkındakı parkinqdə istifadəyə verilib. Xüsusi proqram təminatı ilə idarə olunan enerji doldurma aparatları ən son texnoloji yenilikləri özündə əks etdirir və elektrik avtomobillərində mövcud olan bütün şarjetmə standartlarını dəstəkləyir.

Bu məntəqələrdən istifadə yalnız kart sistemi ilə mümkündür. İlkin mərhələdə bu xidmətdən pulsuz istifadə edilməsi nəzərdə tutulur. Bir avtomobilin enerji ilə doldurulması isə maksimum 20 dəqiqəyə başa gəlir. Hazırda 2 ədəd quraşdırılmış bu cür aparatların yaxın vaxtlarda paytaxtın digər yerlərində və ölkəmizin bir sıra regionlarında da istifadəyə verilməsi planlaşdırılır.

"GreenCar", "Azərişıq" və "Aydia" İctimai Birliyinin birgə təşkilatçılığı ilə həyata keçirilən bu layihədə əsas məqsəd ölkə ərazisində ətraf mühitin mühafizəsi və sağlam ekoloji mühitin yaradılmasına dəstək verməkdir. Layihə çərçivəsində həmçinin müxtəlif ölkələrin istehsalı olan elektriklə işləyən avtomobil, motosiklet, velosiped və digər nəqliyyat vasitələrinin də ölkəmizə gətirilməsi nəzərdə tutulub.