BMW Çin elektrik avtomobilləri alıcılarına xəbərdarlıq etdi - "Kompromislər qaçılmazdır

BMW nümayəndələri Çin istehsalı elektrik avtomobillərində tətbiq edilən ultra sürətli şarj texnologiyalarını şərh edərək potensial alıcıları daha ehtiyatlı olmağa çağırıblar. 

Avtosfer.az Qaynarinfo-ya istinadən xəbər verir ki, bu barədə "PiataAuto.md” yazır.

Qeyd olunur ki, Çin şirkəti BYD yeni "Blade 2.0" batareyası və "Flash" şarj texnologiyasını təqdim edib. Bu texnologiya batareyanı 10%-dən 70%-ə cəmi 4 dəqiqə 54 saniyəyə, 97%-ə isə 8 dəqiqə 47 saniyəyə qədər doldura bilir. BMW-nin akkumulyator istehsalı üzrə direktoru Markus Falmober və "Neue Klasse" proqramının rəhbəri Mayk Rayxelt bildiriblər ki, belə yüksək şarj sürətləri mütləq müəyyən kompromislərlə müşayiət olunur. "Bir parametri, məsələn şarj gücünü xeyli artırmaq mümkündür, amma bu zaman digər göstəricilərdən imtina etmək lazım gəlir”, deyə Falmober qeyd edib.

Onun sözlərinə görə, BMW də öz yeni modellərində şarj gücünü artırmaq imkanına malikdir, lakin bu, batareyanın enerji sıxlığının və uzunömürlülüyünün azalmasına səbəb ola bilər.

Rayxelt isə bildirib ki, BMW "Neue Klasse" modellərində şarj gücü 400 kVt səviyyəsində məhdudlaşdırılacaq. Onun sözlərinə görə, 10 dəqiqəlik şarj təxminən 400 km məsafə üçün kifayət edir.

"On dəqiqə artıq çox qısa bir vaxtdır – bu müddətdə ya qəhvə içirsən, ya da tualetə gedirsən. Daha 1–2 dəqiqə qazanmaq üçün digər daha vacib göstəricilərdən imtina etməyə dəyməz”, deyə o bildirib.

Beləliklə, BMW sürətli şarj yarışında maksimal göstəricilərdən çox balanslı texniki yanaşmaya üstünlük verdiyini vurğulayıb.