Bu gün "Ucuz Tesla” modeli təqdim olunacaq

Elektromobil nəhəngi Tesla, qlobal rəqabətin artması və satışların azalmasına cavab olaraq, ən çox satılan SUV modeli "Model Y"nin daha münasib qiymətə olan versiyasını təqdim etməyə hazırlaşır. Yeni modelin təqdimatı 7 oktyabr, çərşənbə axşamı günü keçiriləcək.

Sosial mediada sirli anons

Avtosfer.az xəbər verir ki, Tesla həftəsonu sosial media platforması X üzərindən iki qısa video yayımlayıb. Birinci videoda qaranlıqdan görünən farlar, ikincidə isə bir neçə saniyəlik fırlanan təkər təsvir edilib. Hər iki videonun sonunda sadəcə “10/7” tarixi yer alıb.

Şirkət və ya Tesla-ya yaxın mənbələr bu dəfə fiziki təqdimat tədbiri barədə heç bir açıqlama verməyib. Buna baxmayaraq, analitiklər və Tesla azarkeşləri bu gün önəmli bir açıqlamanın veriləcəyini gözləyirlər.

Musk: “Hər kəsin ala biləcəyi Tesla”

Tesla CEO-su Elon Musk (İlon Mask) illərdir geniş kütlələrin ala biləcəyi ucuz elektrikli avtomobil istehsalına söz verir. Ötən il 25 min dollarlıq yeni model planı ləğv edilsə də, bu həftə təqdim ediləcək avtomobilin tamamilə yeni deyil, mövcud Model Y platforması üzərində qurulmuş daha sərfəli versiya olacağı bildirilir.

Musk daha əvvəl avtomobilin ABŞ-da vergi güzəştləri daxil 30 min dollardan ucuz olacağını demişdi. Lakin 7 500 dollarlıq vergi təşviqinin sona çatması qiymətləri faktiki olaraq artırıb. Bu da ilin ilk yarısında rekord satışa səbəb olsa da, ikinci yarıda yavaşlama gözləntilərini artırıb.

“Almaq istəyən çoxdur, sadəcə insanların bank hesablarında kifayət qədər pul yoxdur. Qiyməti nə qədər endirsək, bir o qədər yaxşıdır,” – Musk iyul ayında bildirib.

Gecikən istehsal, ilin sonuna təxirə düşən təqdimat

Musk daha əvvəl istehsalın iyun ayına qədər başlamasını vəd etsə də, Tesla iyulda yalnız ilk prototiplərin tamamlandığını açıqlayıb. Şirkət, yeni Model Y versiyasının ilin son rübündə satışa çıxarılacağını bildirmişdi.

Çin və Avropada rəqabət güclənib

Tesla son dövrlərdə xüsusən Çin və Avropada artan rəqabət fonunda satış azalması ilə üzləşib. Musk-ın siyasi çıxışları və sağ yönümlü bəyanatları isə Avropada marka sadiqliyinə mənfi təsir göstərib.

İlin əvvəlində Tesla yenilənmiş Model Y versiyasını təqdim edərək daxili paneldə sensor ekran, yeni işıqlandırma barları və xırda dizayn dəyişiklikləri ilə çıxış etmişdi.

 “Ucuz Tesla” — 20 milyonluq hədəfin açarı

Tesla-nın növbəti 10 ildə 20 milyon avtomobil istehsalı planında ucuz modellər əsas rol oynayır. Bu hədəf həm də şirkətin İdarə Heyətinin Musk-a təqdim etdiyi 1 trilyon dollarlıq bonus paketinin əsas göstəricilərindən biridir. (Marja)