"BYD" və “Geely”də saxtakarlıq aşkarlandı - Subsidiyalar bu mexanizmlə mənimsənilir

Çin hökuməti ölkəni elektromobil liderinə çevirmək üçün nəhəng vəsait ayırır. İndi isə hökumət bu vəsaitin hara xərcləndiyini soruşur. Avtosfer.az üçdilli “gocar.be” saytına istinadla xəbər verir ki, Çinin Texnologiya Nazirliyi avtomobil zavodlarında ciddi audit aparıb və ortaya xoş olmayan nəticələr çıxıb. Hökumət 2009-2023-cü illərdə istehsalçılara təxminən 220 milyard dollar subsidiya ayırıb. Bəzi istehsalçılar üçün hər avtomobilə 8000 dollar dotasiya verilib.
Hökumət məqsədinə qismən nail olub: Çİn dünyanın avtomobil liderinə çevrilib. Elektromobil istehsalında isə hətta Tesla kimi nəhənglər çinli istehsalçılarla ayaqlaşa bilmir.
Audit maraqlı faktı üzə çıxarıb. Hökumət dotasiya zamanı elektromobillərin müəyyən texniki göstəricilərə malik olmasını tələb edib. Xüsusilə də gediş ehtiyatı məsələsində. Məlum olub ki, on minlərlə maşın texniki şərtnaməyə uyğun olmasa da, dotasiya verilib. Saxtakarlıqların 60 faizdən çoxu 2 nəhəng şirkətdə - BYD və “Geely”də aşkar edilib. Hər 2 şirkət məsələ ilə bağlı mətbuata danışmaqdan imtina edir.
Audit həmçinin, çinli istehsalçıların “0 kilometr ikinci əl avtomobil” fırıldağının da üstünü açıb. Hazırda yoxlamalar davam etdiyi üçün saxtakarlığa yol vermiş şirkətləri hansı cəzanın gözlədiyi məlum deyil. Bu fakt məlumdur ki, saxtakarlıqların 70 faizi 2 şirkətdə üzə çıxarılıb.
Avropalı ekspertlərin qənaətinə görə, dotasiya dayandırılacağı təqdirdə Çin mütəxəssisləri istehsalı kəskin azaldacaq. Bu da onların beynəlxalq nüfuzunu zədələyəcək.

Vüqar