Dizel dövrü bitir: İlk dəyişiklik bu nəqliyyat növündən başlayır - AÇIQLAMA

İqlim dəyişikliyi ilə mübarizə və aşağıkarbonlu iqtisadiyyat Azərbaycanın əsas prioritetidir. Rəqəmsal İnkişaf və Nəqliyyat Nazirinin müavini Rəhman Hümmətov bildirib ki, məsələ beynəlxalq öhdəliklərdə də əksini tapıb.

Nəqliyyat sektoru bu sahədə mühüm rola sahibdir. Qlobal emissiyaların 15 faizi, Azərbaycanda isə 13 faizi nəqliyyatın payına düşür. Bakıda xəttə çıxan 2600 avtobusdan köhnə dizel modelləri tam yığışdırılacaq. İl sonunadək onların sayı 500-ə enəcək, gələn il isə tam yenilənəcək.

İctimai nəqliyyatın tam elektrik və ya sıxılmış qazla çalışan avtobuslara keçidi şəhərin mövcud şarj və doldurma infrastrukturu üçün nə dərəcədə hazırdır?

Avtosfer.az xəbər verir ki, Demokrat.az-a bu barədə açıqlama verən nəqliyyat eksperti Rauf Ağamirzəyev bildirib ki, bununla əlaqədar əlavə şarj məntəqələrinin, sıxılmış təbii qazla işləyən nəqliyyat vasitələri üçün yanacaqdoldurma məntəqələrinin və yeni qarajların sayının artırılması məsələsi də gündəmdədir:

"Çünki mövcud infrastrukturun genişləndirilməsi və yeni məntəqələrin yaradılması bu prosesin vacib tərkib hissəsidir. Hazırda fəaliyyət göstərən məntəqələrlə yanaşı, gələcəkdə nəqliyyat vasitələrinin sayının artması və xidmət şəbəkəsinin genişlənməsi nəzərə alınaraq yeni məntəqələrin yaradılması da zərurətə çevrilə bilər".

Onun sözlərinə görə, bu zaman marşrut şəbəkəsinin xüsusiyyətləri, qarajların yerləşdiyi ərazilər və nəqliyyat vasitələrinə xidmət imkanları əsas meyarlar kimi nəzərə alınacaq:

"Yəni yeni şarj və yanacaqdoldurma məntəqələrinin harada yerləşdirilməsi, eləcə də qarajların sayının artırılması mövcud infrastrukturun imkanları və gələcək tələbat əsasında planlaşdırıla bilər".