Ekspert ödənişli yol barədə: "Əgər oradan meyit daşımaq istəmiriksə..."

Ödənişli olan Bakı-Quba-Rusiya dövlət sərhədi yeni avtomobil yolunda radar və sürət həddinin olmaması ilə bağlı sosial şəbəkələrdə videolar yayılıb. Bu, heç də vətəndaşlar tərəfindən birmənalı qarşılanmayıb.

Məsələ ilə bağlı Sfera.az-a açıqlamasında nəqliyyat eksperti Elməddin Muradlı bildirib ki, bunun ciddi fəsadları olacaq: “Düşünürəm ki, yeni ödənişli yolda radar və kameraların olmaması problemli mövzudur, bunun ciddi fəsadları olacaq. Çünki dünyanın bir çox ölkəsində olduğu kimi bizim sürücülərimiz də yüksək sürətə meyillidir. İnsanların mədəniyyət və təfəkkürü əgər inkişaf edibsə, o bilir ki, sürət ona ziyan verəcək, qəza törədəcək. Çox təəssüf, bizdə bir çox insan fikirləşir ki, kamera yoxdursa, istədiyimizi edək".

Ekspert vurğulayıb ki, radar və kamera mütləq quraşdırılmalıdır: “Bu məsələ dərhal həll edilməlidir. Digər yollarda necə nəzarət varsa, bu yollarda da radar və kamera quraşdırılmalıdır. Fikrimcə, aidiyyatı qurumlar burada nəzarəti mütləq həyata keçirməlidirlər.  Ərazidə yol patrul xidməti olmalıdır. Əks halda, fəsadları çox ağır olacaq. Biz oradan meyit daşımaq istəmiriksə, gec olmadan dediklərim diqqətə alınmalıdır”.