Etibarnamə heç vaxt etibarlı ola bilməz - SÜRÜCÜLƏR OXUSUN

Avtomobil alan şəxs çox vaxt onu öz adına keçirmir, Etibarnamə almaqla məsələnin həll olunduğunu hesab edirlər. Amma istənilən vaxt qanuni cəhətdən onun müsadirəsi mümkündür. Bəs problem nədədir?

Avtosfer.az xəbər verir ki, bu barədə atv.az-a məlumat verən hüquqşunas Ərşad Hüseynov bildirib ki, Etibarnamə heç vaxt alqı-satqı deyil və heç vaxt da buna görə istifadə oluna bilməz. “Avtomobillərin alqı-satqısının qanunvericilikdə nəzərdə tutulan qaydası var. Buna riayət etmək lazımdır. Belə ki, avtomobili alan və satan ilk növbədə sənədlərlə birlikdə Dövlət Yol Polisi (DYP) idarəsinə yaxınlaşmalıdır. Orada avtomobil köhnə sahibinin adından çıxarılaraq yeni sahibinin adına keçirilir və bununla bağlı yeni sahibinə “Qeydiyyat Şəhadətməsi” verilir. Bu qanunla nəzərdə tutulan haldır. Avtomobil alanların istifadə etdiyi digər bir variant isə Etibarnamədir. Onun mahiyyətinə görə, avtomobil satan şəxs onu yeni sahibinə müvəqqəti olaraq verir. Yəni, onu istədiyi vax hüquqi şəkildə ala bilər. Avtomobil sahibinin banka borcu olarsa, əmlakı dövlət tərəfindən müsadirə edilərsə, yaxud da boşanarsa, əmlakı bölündüyü üçün həmin avtomobillə bağlı qərar çıxarılır, saxlanılaraq müsadirə edilir. Çünki onun avtomobil üçün verdiyi pul məhkəmə təcrübəsində yox dərəcəsindədir”.

“Bu kimi problemlə qarşılaşan şəxs ilk növbədə etibarnamə aldığı şəxsə yaxınlaşmalı, problemin həlli yolunu tapmalıdır. Yəni, əgər həmin şəxsin banka kiçik miqdarda borcu varsa, o ödənilməlidir. Yox, əgər bu böyük həcmli bir problemsə, şəxs o zaman məhkəməyə müraciət edə bilər. Amma onun prespektivi çox zəifdir”- deyə hüquqşunas qeyd edib.

Qısası, avtomobil alarkən mütləq onu öz adınıza keçirin.