Filmlərdəki nömrədəyişmə əməliyyatı Bakıya çatdı – Bir düymə ilə nömrə dəyişir

Bakıda bəzi sürücülər yol hərəkəti qaydalarını pozaraq məsuliyyətdən yayınmaq üçün müxtəlif üsullara əl atırlar. Bir vaxtlar nömrənin üzərindəki «çip»i sıradan çıxarırdılar, maşının qabaq alın şüşəsindən disk asırdılar ki, guya bununla radara düşməyəcəklər, kamera onları çəkməyəcək. Ən son variant kimi nömrənin üzərinə qara örtük çəkməyə başlamışdılar. Ötən il Bakıda belə sürücülərdən biri «Porcshe» markalı avtomobillə saxlanılmışdı. İndi isə daha yeni üsul tapıblar.

Avtosfer.az-ın əldə etdiyi məlumata görə, artıq filmlərdə gördüklərini real həyatda tətbiq edən bəzi sürücülər var. Xüsusən də Bakı şəhərində bir neçə belə sürücünün olduğu bildirilir. Onlar xüsusi vasitələrin köməyi ilə bir avtomobilə iki fərqli nömrə vururlar. Həm arxa, həm də qabaq hissədəki nömrələrdən biri həqiqi, digəri isə fərqli olur. Avtomobilin salonuna quraşdırılmış düyməni basan kimi əsl nömrə çevrilir və saxta nömrə görünür. Bununla da kobud qayda pozuntusuna yol verərərək məsuliyyətdən yayınmağa çalışırlar. Hətta saxta nömrə ilə qayda pozub sonradan əsl nömrəni üzə çıxarmağı adət ediblər.

Lakin əldə etdiyimiz məlumata görə, yol polisi son günlər bu cür əməllərə yol verən bir neçə sürücünü aşkar edə bilib. Belə ki, Yol-Patrul Xidmətinə verilmiş yeni avtomobillərdə quraşdırılan xüsusi texniki vasitələrin köməyi ilə saxta nömrə ilə avtomobil idarə edənlər dərhal aşkar olunur. Məhz həmin DYP avtomobilləri istismara veriləndən sonra belə faktların üstü açılıb. Dünən axşam saatlarında maşına iki fərqli nömrə vurduğu ehtimal edilən «Mersedes» markalı avtomobil şəhərin mərkəzində saxlanılıb. 

Fərid