Güclü külək iki yük maşınını aşırdı - VİDEO

Paytaxt ərazisində əsən güclü külək yol qəzalarına səbəb olub. Belə hadisələrdən biri Bakı-Ələt avtomobil yolunun 19-cu kilometrliyində, Qaradağ rayonu ərazisində baş verib. Avtosfer.az-ın APA TV-yə istinadən məlumatına görə, Bolqarıstan vətəndaşı Nikolay Georgiyeviç Kurkovun idarə etdiyi ağır tonnajlı yük maşını Ələt qəsəbəsi istiqamətində hərəkətdə olan zaman aşıb. Maşının yük hissəsi boş olduğundan, əsən güclü külək onu aşırıb. Hadisə nəticəsində xəsarət alan olmasa da yolda tıxac yaranıb. Qəzadan sonra maşının yanacaq cəni zədə gördüyü üçün ətrafa tezalışan maddə dağılıb. Buna görə hadisə yerinə Fövqəladə hallar Nazirliyinin əməkdaşları çağırılıb. Baş verəcək hadisənin qarşısını almaq üçün ehtiyat tədbirləri görülüb. Yolun əks tərəfində isə "MAN" markalı yük  maşını da aşıb. Bu hadisə zamanı da xəsarət alan olmayıb. Lakin avtomobilə maddi ziyan dəyib. Hər iki faktla bağlı araşdırma aparılır.