İki nəfərin ölümünə səbəb olan şəxsə 11 il HƏBS

Bu gün Bakı Ağır Cinayətlər Məhkəməsində 2 nəfərin ölümü ilə nəticələn ağır-yol nəqliyyat hadisəsi törətməkdə təqsirləndirilən Şamaxı rayon sakini, 1980-cı il təvəllüdlü Zaur Həmidovun cinayət işi üzrə məhkəmə prosesi başa çatıb. Lent.az-ın məlumatına görə, hakim Tamella Nəsrullayevanın sədrliyi ilə keçirilən prosesdə hökm oxunub. Hakimlər kollegiyasının qərarı ilə Z. Həmidov 11 il müddətinə azadlıqdan məhrum edilib.

Qeyd edək ki, bu il sentyabrın 11-də gecə saatlarında Bakı-Şamaxı yolunun Şamaxı rayonu ərazisindən keçən hissəsində ağır avtomobil qəzası baş verib.Səməndər Qarayevin idarə etdiyi 10 CS 733 dövlət nömrə nişanlı “Qazel” mikroavtobusu ilə Zaur Həmidovun sürdüyü 10 FX 456 dövlət nömrə nişanlı “VAZ-2106” markalı avtomobil bir-birinə çırpılıb. Nəticədə “Qazel”də olan Gülnaz Əli qızı Bayramova və Murad Bəxtiyar oğlu Cixaidzi hadisə yerindəcə keçinib. Digər sərnişinlər isə yaralanıb.

Məlumata görə, qəzada ölənlər və yaralılar Şamaxının Mədrəsə kənd sakinləri olub. Onlar qonşu kənd olan Meysəri kəndindən yığıncaqdan gələn zaman qəza baş verib.