“Jaguar Land Rover”ə edilən kiberhücum 2,5 milyard dollara başa gəlib

Hindistanın “Tata Motors” şirkətinə məxsus “Jaguar Land Rover”ə (JLR) avqust ayında edilən kiberhücum Britaniya iqtisadiyyatına 1,9 milyard funt sterlinq (2,55 milyard ABŞ dolları) ziyan vurub və ölkədəki 5 mindən çox təşkilata təsir edib.

Avtosfer.az “Reuters”ə istinadən xəbər verir ki, bu barədə Kibermonitorinq Mərkəzinin (CMC) çərşənbə günü dərc etdiyi hesabatda deyilir.

“Bu hadisə, çox güman ki, Böyük Britaniya tarixində iqtisadi cəhətdən ən zərərli kiberhücum olub, maliyyə nəticələrinin əsas hissəsi JLR müəssisələrində və onların təchizatçılarında istehsal həcmlərinin itkisi ilə bağlıdır”, - deyə CMC hesabatında bildirilir.

Hesabatda qeyd edilir ki, avtomobil istehsalçısının zavodunda istehsalın hücumdan əvvəlki səviyyəyə bərpasında gözlənilməz gecikmələr yaranarsa, itkilər daha yüksək ola bilər.

JLR şirkəti bu ayın əvvəlində hücum nəticəsində yaranan təxminən altı həftəlik dayanmadan sonra istehsalı bərpa etməyə başlayıb. Lüks sinif avtomobil istehsalçısının İngiltərədə gündə 1 minə yaxın avtomobil istehsal edən üç fabriki var.

Analitiklərin qiymətləndirmələrinə görə, istehsalın dayandırılması səbəbindən həftədə təxminən 50 milyon funt sterlinq itirən JLR şirkəti təchizatçıları dəstəkləmək üçün sentyabrın sonunda Britaniya hökumətindən 1,5 milyard funt sterlinq kredit zəmanəti alıb.