“Mazda”lar da bahalaşdı

Azərbaycanda satılan “Mazda” markalı minik avtomobillərinin qiyməti artıb. Avtosfer.az fins.az-a istinadən məlumat verir ki, bahalaşma bu maşınlara tətbiq edilən endirimlərin ləğv edilməsi ilə bağlıdır. Məsələn, 2 min manatlıq endirimin ləğvindən sonra “Mazda 3” 23900 manata satılır. “Mazda 2” almaq istəyənlər isə indiyə qədər 14 min manata olan avtomobilə görə indi əlavə 900 manat ödəməli olacaqlar. “Mazda CX 5” modelinin qiyməti  22 500 manatdan 24 900 manata, “Mazda 6” modelinin qiyməti isə 29900 manatdan 34000 manata yüksəlib. Ən böyük bahalaşma isə “Mazda CX 9” modelində olub.  Avtomobil  4900 manatlıq endirim ləğv edildikdən sonra  41900 manata satılır. “Mazda” avtomobillərinin qiymətində növbəti artım isə gələn ay olacaq. “Mazda Azerbaijan” şirkətindən fins.az-a verilən məlumata görə, bahalaşma Azərbaycanda manatın kəskin ucuzlaşdırılması ilə əlaqədardır. Hər maşının qiymətində 3-4 min manatlıq artım gözlənilir. Şirkətin satış departamentindən bildirilib ki, fevral-mart aylarında gözlənilənlərin əksinə olaraq satışlarda artım müşahidə edilib. Belə ki, qiymətlərin qalxacağını bilən müştərilər daha cəld hərəkət edərək  avtomobil sahibi olmağa çalışıblar.  Bu isə satışların bir qədər artmasına təsir göstərib.