Minik, yoxsa yük avtomobili? - VİDEO

Şəmkirdə sürücü minik avtomobilini yük maşını kimi istifadə edir.

Bununla bağlı kadrlar Şəmkir rayonu “Dörd yol” adlanan ərazidə çəkilib.

Digər sürücülərdən biri həmin anları çəkərək ''Xəzər Xəbər''in vatsap nömrəsinə göndərib.

Görüntülərdən də aydın olur ki, ''VAZ-2106'' markalı avtomobilin sürücüsü avtomobilə normadan artıq yük yığıb.

Sürücü təxminən 2-3 metrə qədər yuxarı qaldırdığı təhlükəli yükü isə iplə bir neçə yerdən bağlayıb. O, öz həyatı ilə yanaşı digər hərəkət iştrakçıları üçün də ciddi təhlükə yaradıb. Küləkli havada həmin yük - dəmir parçaları hər an yola səpələnə bilər. Bu da yolda faciəvi qəzalara səbəb olar.

Görüntüyə münasibət bildirən yol hərəkəti qaydaları üzrə ekspert Elməddin Muradlı deyib ki, sürücü yükdaşıma qaydalarını kobud şəkildə pozub.

Ekspert bildirib ki, İnzibati Xətalar Məcəlləsində bu pozuntuya görə  40 manat cərimə nəzərdə tutulur.

Məsələ ilə bağlı Baş Dövlət Yol Polisi İdarəsindən isə bilidirildi ki, həmin avtomobilin sürücüsü aşkar edilib və barəsində qanunamüvafiq tədbirlər həyata keçirilib.