Pərdə sezonu başa çatdı - 150 manat cəriməsi var

Qanuna uyğun olaraq hər il olduğu kimi bu il də may ayının 1-dən etibarən avtomobillərin yan şüşələrində sənaye üsulu ilə quraşdırılan pərdə və plyonkalara verilən icazə noyabrın 15-də başa çatır. Buna görə də bir neçə güdən sonra yol polisi əməkdaşları avtomobillərdə pərdə və jalüz aşkar edərsə, cərimələr tətbiq ediləcək. Kustar üsulla hazırlanmış və quraşdırılan pərdələrə isə ümumiyyətlə icazə verilmədiyindən təkcə ötən həftə ərzində 49 sürücü cərimələnib. “Noyabrın 16-dan etibarən idarə edilən nəqliyyat vasitələrinin şüşələrinin görünüşünü məhdudlaşdıran və şəffaflığı korlayan - pərdə, plyonka və digər qurğuların quraşdırılaraq istismar edilməsi “Yol hərəkəti haqqında” qanun tələbinə əsasən inzibati xəta hesab edilir. Və bunu edən şəxslər 150 manat məbləğində cərimə olunacaqlar”, – deyə Bakı Şəhər Baş Dövlət Yol Polisi İdarəsinin şöbə rəisi Vaqif Əsədov bildirib.