Qeydiyyatdan keçən avtomobillərin 30 faizi sığortasızdır

Respublika üzrə qeydiyyatdan keçmiş avtomobillərin təqribən 30%-i icbari sığortaya cəlb olunmayıb. Avtosfer.az Yeni Azərbaycan Partiyasının (YAP) rəsmi saytına istinadən xəbər verir ki, bu barədə Dövlət Sığorta Şirkətinin sədri Məmməd Məmmədov bildirib. “Avtomobillərin icbari sığortaya cəlb olunmasında DYP-nin və digər təşkilatların köməyinə ehtiyac var” - deyə, sədr bildirib.

Onun sözlərinə görə, cari ilin sonunadək şirkət iqtisadi cəhətdən səmərəli olmayan bir neçə filialını bağlayacaq: “Dövlət Sığorta Şirkəti respublikanın bütün rayon və şəhərlərində hüquqi və fiziki şəxslərə 28 könüllü, 8 icbari sığorta növü üzrə xidmət göstərən 79 filialı mövcüddür.Şirkətin İdarə Heyətinin müvafiq qərarları ilə iqtisadi cəhətdən səmərəli olmadığına görə Sumqayıt şəhəri, Naftalan şəhəri, Zərdab rayon və 2 saylı Bakı şəhər filiallarının fəaliyyəti dayandırılıb. Cari ilin sonunadək iqtisadi cəhətdən səmərəli olmayan bir neçə filialın fəaliyyətinin dayandırılması nəzərdə tutulub”.

M.Məmmədov qeyd edib ki, sığorta hadisələri nəticəsində zərərçəkmiş əmlak sahiblərinə 1 mln. manat sığorta ödənişi verilib: “Respublika üzrə mövcud olan yaşayış evlərinin və mənzillərin cəmi 6%-i icbari sığortaya cəlb olunub. Bu səbəbdən də Dövlət Sığorta Şirkəti tərəfindən 89 526 yaşayış evi və mənzil sığorta olunmaqla 3 mln. manat sığorta haqqı toplanmasına nail olunub. Qeyd olunan dövrdə qanunda nəzərdə tutulmuş sığorta hadisələri nəticəsində zərərçəkmiş əmlak sahiblərinə 1 mln. manat sığorta ödənişi verilib”.