Sürücülərin diqqətinə! - Bu problemə ucuz və təbii həll yolu

Soyuq havalarda sürücülərin ən böyük problemlərindən biri avtomobil şüşələrinin buğulanmasıdır və bu buğunun tez bir zamanda itməməsi həm sürmə rahatlığını, həm də təhlükəsizliyi ciddi şəkildə azaldır. Görmə sahəsinin zəifləməsi qəza riskini artırdığı üçün bir çox avtomobil sahibi buğulanmanı aradan qaldırmağın təbii və effektiv yollarını axtarır. Mütəxəssislərin tövsiyə etdiyi bəzi tamamilə təbii üsullar sayəsində avtomobil şüşələrində yaranan buğulanmanı qısa müddətdə azaltmaq mümkündür. Avtosfer.az “Yeni Sabah”a istinadən xəbər verir ki,  aşağıdakı praktik metodlar buğulanmaya qarşı ən təsirli təbii çarələr hesab edilir:

Kartofla silmə üsulu

Kartofun tərkibindəki təbii nişasta şüşənin üzərində nazik, görünməz bir qoruyucu təbəqə yaradır. Bu təbəqə buğunun şüşəyə yapışmasını çətinləşdirir və buğulanmanı xeyli azaldır. Kartofu iki yerə bölüb şüşənin iç tərəfinə sürün, sonra quru bezlə parladın. Təsiri bir neçə gün davam edir və tamamilə təbii metoddur.

Soda və ya düyü

Karbonat və düyü güclü təbii nəmlikuduculardır. Kiçik parça kisəyə soda və ya düyü doldurub avtomobilin  içərisinə b və ya oturacaq altına yerləşdirin. Bu üsul havadakı artıq nəmi çəkərək şüşələrin daha az buğulanmasını təmin edir. Kisənin içini 2–4 həftədə bir təzələmək kifayətdir.

Dəniz duzu

Dəniz duzu havadakı nəmi çəkmə gücü yüksək olan təbii maddələrdən biridir. Kiçik qab və ya kisəyə dəniz duzu qoyub avtomobilin içinə yerləşdirin. Nəmlik azaldıqca xüsusilə səhərlər yaranan buğulanma böyük ölçüdə azalır. Duz nəmləndikcə qarışdırmaq və ya yeniləmək məsləhətdir.

 Ağ sabunla şüşə təmizləmə

Təbii ağ sabun şüşənin üzərində nazik və sürüşkən bir təbəqə yaradır və buğu şüşəyə yapışa bilmir. Bir parça bezə çox az sabun sürüb şüşənin iç tərəfinə nazik şəkildə çəkin, sonra mikrofiber bezlə parladın. Bu üsul xüsusilə qış aylarında buğunun gec yaranmasına kömək edir. Bu üsullar həm sərfəli, həm də tamamilə təbiidir. Kimyəvi maddələrdən istifadə etmədən avtomobil şüşələrindəki buğulanmanı azaltmaq istəyirsinizsə, bu metodları sınamaq faydalı olacaq.