Sürücülük vəsiqəsi yoxdur; 5 ildir Şirvandan Bakıya taksi sürür - FOTO

Bakıda sürücülük vəsiqəsi olmadan avtomobil idarə edən, yol polisinə tabe olmayan, avtoxuliqanlıq edən şəxs həbs olunub. Avtosfer.az-ın məlumatına görə, hazırda Daxili İşlər Nazirliyinin İnzibati həbs olunanların saxlanma məntəqəsində cəza çəkən Fərzəliyev Ruslan Sədrəddin oğlu Sabirabad rayonunda anadan olub. Rəsmi olaraq işsiz kimi özünü təqdim etsə də, düz 5 ildir Şirvan-Bakı marşrutu üzrə taksi fəaliyyəti ilə məşğul olur. Amma onun sürücülük vəsiqəsi yoxdur.

25 yaşlı Ruslan Fərzəliyev evlidir. Özünün dediyinə görə, indiyə qədər 2 dəfə yol polisində imtahan verərək sürücülük vəsiqəsi almaq istəyib. Lakin imtahandan keçə bilmədiyi üçün qərara alıb ki, elə sürücülük vəsiqəsi olmadan da maşın sürə bilər: «Artıq 5 ildir Şirvandan Bakıya müştəri daşıyıram. Hamı elə bilir ki, sürücülük vəsiqəm var. Çünki 5 ildə heç vaxt qayda pozmamışam, heç vaxt da yol polisi məni saxlamayıb, cəriməm olmayıb».

Amma mayın 8-də Şıx çimərliyinin yanından keçəndə DYP əməkdaşları Ruslana «saxla» işarəsi veriblər. Lakin o, əmrə tabe olmayaraq qaçmağa çalışıb. Bir qədər sonra isə DYP-nin Qaradağ postunda saxlanılan Ruslan Fərzəliyev məhkəməyə aparılıb və onun barəsində 20 gün inzibati həbs qərarı çıxarılıb. Artıq 10 gündür həbs cəzası çəkən Ruslan Avtosfer.az-ın əməkdaşının sualına cavab olaraq bildirib ki, cəzasını çəkib çıxandan sonra yenə də vəsiqə olmadan avtomobil sürəcək. 

Elməddin