“Tesla” Çindəki bazar payını itirməyə davam edir

ABŞ-ın elektrokar istehsalçısı “Tesla” şirkətinin satış göstəriciləri azalmağa davam edir.

Avtosfer.az xəbər verir ki, “Tesla” Avropanın əsas avtomobil bazarlarında – Almaniya, Fransa və İsveçdə ciddi geriləmələrlə üzləşib. ABŞ-da isə şirkətin baş direktoru və əsas səhmdarı İlon Maskın siyasi fəaliyyəti, xüsusən Prezident Donald Trampa dəstəyi kompaniyanın imicinə mənfi təsir göstərib.

Elektrik avtomobillərinin ən iri bazarı hesab olunan Çində ötən il satışlarını artırmağa nail olan “Tesla”, cari ildə rəqabətin kəskinləşməsi səbəbindən həmin bazarda da geriləməyə başlayıb. Məlumata görə, şirkət bu ilin yanvar-aprel aylarında ÇXR-də cəmi 163 min 338 avtomobil sata bilib.

Çində elektrik və hibrid avtomobilləri bazarı sürətlə böyüdüyü halda, “Tesla” şirkətinin payı əhəmiyyətli dərəcədə azalır. Belə ki, 2023-cü ildə Çinin elektrik avtomobilləri bazarında ikinci, 2024-cü ilin əvvəlində isə üçüncü yerdə qərarlaşan kompaniya cari ilin ilk dörd ayında 4,6 faiz payla beşinci sıraya düşüb.

Qeyd edək ki, digər ölkələrin avtomobil istehsalçıları da Çin bazarında rəqabətə davam gətirməyə çətinlik çəkirlər. Uzun illər ərzində bu bazarın lideri olan “Volkswagen” son dövrlər mövqeyini yerli BYD şirkətinə təhvil verib.