Volkswagen yeni hetçbekini təqdim etməyə hazırlaşır

Volkswagen şirkəti ID ailəsinin auditoriyasını "qaynar" elektrokarların köməyi ilə genişlətməyə ümid edir.

Belə elektromobillərdən biri Volkswagen ID.3 hetçbekinin ikimühərrikli tam ötürməli "qaynar" versiyası ola bilər.

Avtosfer.az ted.az-a istinadən bildirir ki, belə bir "qaynar" hetçbekin işıq üzü görəcəyi barədə məlumat 2019-cu ilin sentyabrında, adi hetçbekin təqdimatından dərhal sonra peyda olmuşdu. O zaman, "qaynar" elektromobilin tam ötürməli idman avtomobilləri üçün ənənəvi olan R indeksi ilə işarələnəcəyi ehtimal olunurdu, lakin istehsalçı ayrıca GTX subbrendini yaradaraq, "qaynar" hetçbek barədə söz-söhbəti yenidən canlandırıb.

Volkswagen şirkəti cari ilin ikinci yarısında təqdim ediləcək ID.5 kupe-krossoverinin də GTX versiyasına sahib olacağını artıq təsdiqləyib. Yeni elektrokar MEB arxitekturası üzərində inşa edilmiş premium Audi Q4 Sportback e-tron modelinin bənzəri olacaqdır.