Yol polisi gecə Bakıda postlar qurmağa başladı -  RƏSMİ AÇIQLAMA

Son günlər paytaxt Bakıda gecə saatlarında yol polisləri post qurmağa başlayıb. Avtosfer.az-ın məlumatına görə, müxtəlif yerlərdə yolun hərəkət hissəsində dayanan yol polisi əməkdaşları yolda hərəkəti məhdudlaşdıraraq bütün avtomobilləri bir-bir saxlayıb yoxlayırlar. Bəzi hallarda heç bir xüsusi vasitə tətbiq olunmur və sadəcə sürücülərdən spirtli içki qoxusu gəlib-gəlmədiyini yoxlayıb sərbəst buraxırlar. Sərxoşluq şübhəsi olan sürücülər isə saxlanılaraq tibbi müayinə mərkəzinə aparılır.

Avtosfer.az məsələ ilə bağlı Bakı şəhər Dövlət Yol Polisi İdarəsinin bölmə rəisi, polkovnik Vaqif Əsədova müraciət edib. DYP rəsmisi bildirib ki, həqiqətən də son günlər Bakıda gecələr yol polisi əməkdaşları tərəfindən postlar qurulur və sərxoş sürücülərlə bağlı yoxlama aparılır: «Bu kimi postların qurulması avtomobili sərxoş halda idarə edən sürücülərin aşkarlanması ilə bağlıdır. Ən azından, günün qaranlıq vaxtı yol polislərinin «saxla» işarəsinə əhəmiyyət verməyərək məsuliyyətdən yayınmağa çalışan sürücülərin qarşısı həmin postlarda alınır. Artıq ötən günlə müqayisədə sərxoş halda avtomobilin idarə edilməsi faktlarının sayı aşağı düşüb ki, bu da yaxşı göstəricidir».

Elməddin