Avtobuslarda nağdsız ödənişlər üçün yeni tətbiq yaradılıb - VİDEO

Azərbaycanda ictimai nəqliyyatda daha bir yenilik tətbiq olunub.

Avtosfer.az xəbər verir ki, bu barədə Azərbaycan Yerüstü Nəqliyyat Agentliyinin direktoru Anar Rzayev məlumat verib. O, bildirib ki, yeni mobil tətbiq avtobuslarda ödənişləri asanlaşdırmağa, eyni zamanda sərnişinlərin bir nöqtədən digərinə getməsini daha rahat təmin etməyə hesablanıb.
Anar Rzayev bildirib ki, hazırda beta versiyasında çalışan mobil tətbiq iyulun 1-dən etibarən tam fəaliyyətə başlayacaq. 

“BakıKart” mobil tətbiqi və www.bakikart.az saytı vasitəsilə təmin edilən platforma üzrə hesablar vahiddir. Bu o deməkdir ki, www.bakikart.az saytı ilə qeydiyyatdan keçmiş istifadəçilər üçün mobil tətbiqdə yenidən qeydiyyatdan keçməyə ehtiyac yoxdur. İstifadəçilər yalnız qeydiyyatdan keçdiyi mobil nömrə və şifrə daxil etməklə mobil tətbiqdən yararlana bilərlər. “BakıKart” mobil tətbiqinin beta versiyasını həm “App Store”, həm də “Google Play Store”da yükləmək mümkündür. Tətbiq hazırda beta versiyada olduğu üçün istifadəçilər xətalarla və yaxud qeyri-dəqiq məlumatlarla qarşılaşa bilərlər. Bununla əlaqədar olaraq beta istifadəçilərdən qarşılaşdıqları xətalar barədə tətbiq vasitəsilə məlumat vermələri xahiş olunur. Texniki məsələlərlə bağlı *4343 qısa nömrəsinə və “141” Çağrı Mərkəzinə müraciət etmək olar”, - deyə A.Rzayev əlavə edib.

Qeyd edək ki, yeni tətbiqdən BakıKart ödənişlərini rahat şəkildə həyata keçirmək mümkün olacaq.