“Azərbaycan Dəmir Yolları” ilk dəfə qadın maşinistlər hazırlayacaq

“Azərbaycan Dəmir Yolları” QSC (ADY) ilk dəfə qadın maşinistlərin hazırlığına start verib.

Avtosfer.az bu barədə səhmdar cəmiyyətinə istinadən xəbər verir.

Məlumata görə, hazırlıq prosesi çərçivəsində Dəmir Yolu və Metropoliten üzrə Bakı Dövlət Peşə Təhsil Mərkəzində stansiya növbətçisi ixtisasında təhsil alan qadın tələbələr ADY-də xüsusi təlimlərdən keçəcəklər. Təlimlərdən sonra imtahanı uğurla başa vuranlar dəmiryol nəqliyyatının idarə edilməsi üçün vəsiqə qazanacaqlar.

Peşə Təhsil Mərkəzinin bir qrup tələbəsi artıq Bakı Dəmiryol Vağzalında müasir sürət qatarlarının idarə edilməsi ilə yaxından tanış olub, burada ADY mentorları ilə söhbət aparıblar. Tələbə Ağsənəm Məmmədova bildirib ki, ən böyük arzularından biri Azərbaycan dəmir yollarında ilk qadın maşinist olmaqdır.

Tələbələrin ilkin olaraq istehsalat təcrübəsinə cəlb olunması nəzərdə tutulur.