Azərbaycanda hava şəraiti ilə əlaqədar bütün limanlar bağlanıb

Azərbaycanın Rəqəmsal İnkişaf və Nəqliyyat Nazirliyi yanında Dövlət Dəniz və Liman Agentliyinin (DDLA) Gəmilərin Hərəkətini İdarəetmə Mərkəzinin (GHİM) mütəxəssisləri hər zaman olduğu kimi bu gündə gücləndirilmiş iş rejimində çalışır.

Avtosfer.az xəbər verir ki, bu barədə “Report”a DDLA-nin İctimaiyyətlə əlaqələr xidmətinin mətbuat katibi Pərvanə İmanova məlumat verib.

“Hazırda Azərbaycanın bütün dəniz limanlarında gəmilərin giriş-çıxışına qadağa qoyulub. Xəzər dənizində şimal-qərb və şimal küləyinin güclənəcəyi, bəzi yerlərdə küləyin sürətinin 30 m/s-yə çatacağı, dalğanın hündürlüyünün isə 5,5 metrə qədər güclənəcəyi gözlənilir.

Çətin hava şəraiti nəzərə alınaraq dənizdəki bütün gəmilər xüsusi sığınacaqlara yerləşdirilib və GHİM-nin mütəxəssisləri tərəfindən nəzarət olunur. Azərbaycanın ərazi sularında faktiki vəziyyətə nəzarət etmək məqsədilə GHİM-nin  mütəxəssisləri  küləyin azalma anına qədər  məlumat mübadiləsini və gəmilərin hərəkətinin tənzimlənməsini davam etdirəcəklər”, - P. İmanova bildirib.

Qeyd edək ki, hazırda ölkə ərazisində qarlı və şaxtalı hava şəraiti davam edir. Bakıda və Abşeron yarımadasında - 4, Aran rayonlarında -3, Naxçıvan MR-da -10, dağlıq rayonlarda isə -20 dərəcəyədək şaxta qeydə alınıb.