Bakıda PKK simvolu yapışdırılmış maşınlar peyda olub - DYP-dən AÇIQLAMA

Jurnalist Aygün Muradxanlı sosail media hesabında hər kəsin marağına səbəb olan paylaşım edib. O, paylaşımında bildirir ki, Bakıda son 1 həftə ərzində 3 dəfə PKK-nın simvolu yapışdırılmış avtomobillə rastlaşıb.

“Orta sinif köhnə maşınlar idi. Biri Badamdarda, biri Cavid prospektində, digəri isə Bayılda rastıma çıxıb. Əgər küçədə gün boyu heç yarım saat olmayan mən, 3 dəfə görmüşəmsə, demək ki, çoxdurlar. Nə məsələdir? DYP bu simvolu tanımalıdır axı”,- deyə jurnalist bildirir.

Avtosfer.az xəbər verir ki, məsələ ilə bağlı Bakı Şəhər Baş Dövlət Yol Polisi İdarəsinin şöbə rəisi, polkovnik Vaqif Əsədov bizimyol.info-ya bildirib ki, bununla bağlı heç bir informasiya daxil olmayıb. “Nəqliyyat vasitəsinin üzərində PKK-ya məxsus olan simvol vurulubsa, yəqin ki, aidiyyatı üzrə araşdırma aparılacaq. Mən bir vətəndaş, sürücü, yol polisi olaraq hesab edirəm ki, belə hallara yol vermək olmaz”.