Bu şadlıq sarayları cərimələnəcək - İLGİNC SƏBƏB

Toy mərasimləri zamanı bəzən müştəri ilə restoran arasında əvvəlcədən razılaşdırılan menyu və xidmət şərtləri ilə faktiki təqdim edilənlər arasında fərqlər yaranır. Belə hallarda menyuda göstərilən içkilərin və markaların dəyişdirilməsi, yaxud masalarda əvvəlcədən razılaşdırılmış stul sayının azaldılması istehlakçı narazılığına səbəb olur. Məsələ istehlakçı hüquqlarının pozulması aspektindən də müzakirə olunur. Avtosfer.az-ın məlumatına görə, mövzu ilə bağlı "Konkret.az"a danışan vəkil Ramil Süleymanov bildirib ki, menyuda göstərilən qiymətlərin toy zamanı dəyişməsi əsasən tələb-təklif münasibətləri ilə bağlı olur. Onun sözlərinə görə, bəzən qiymət artımı restoran tərəfindən əlavə xidmətlərin göstərilməsi ilə izah edilir, bəzi hallarda isə daha çox müştəri cəlb etmək məqsədilə əvvəlcədən endirimli qiymətlər təklif olunur. “Əsas məsələ ondan ibarətdir ki, toyla bağlı müraciət edən müştəriyə menyuda əvvəlcədən razılaşdırılmış yeməklər, soyuq qəlyanaltılar və içkilər təqdim edilməlidir. Əgər bu təmin olunmazsa, artıq istehlakçının hüquqlarının pozulması hesab olunur,” – deyə vəkil qeyd edib.

Ramil Süleymanov əlavə edib ki, belə hallarda müştəri məhkəməyə iddia ərizəsi ilə müraciət edərək vurulmuş zərərin ödənilməsini tələb edə bilər. “Bundan başqa, məhkəmə istehlakçı hüquqlarının pozulması faktını müəyyən edərsə, həmin restoran barəsində inzibati xəta işi də açılır. Nəticədə sahibkar inzibati qaydada cərimələnir,” – deyə o, vurğulayıb.