İnsanlar şəhər mühitində hərəkət vərdişlərini dəyişəcək – Eldəniz Cəfər

Şəhər həyatının inkişafı ilə əlaqədar insanların hərəkət vərdişləri də dəyişir. Şəhər mühitində nəqliyyatın daha əlverişli və çevik olması üçün müxtəlif alternativlər gündəmə gəlir. Bu alternativlər arasında velosiped və skuter kimi kiçik mühərrikli nəqliyyat vasitələrinin rolu artmaqdadır. Bu dəyişikliklər, xüsusən gənc nəsil arasında daha geniş yayılmağa başlayıb. 

Bəs insanların şəhər daxilində hərəkət etmə vərdişləri necə dəyişəcək? Velosiped və skuter kimi alternativ nəqliyyat vasitələrinin rolu artacaqmı?

Mövzu ilə bağlı nəqliyyat eksperti Eldəniz Cəfərli Avtosfer.az-a açıqlamasında bildirib ki, insanların şəhərdaxili hərəkəti həmin şəhərin infrastrukturasına bağlı bir məsələdir:

“Düşünmürəm ki, tezliklə bizim insanlarımız hərəkət vərdişlərini dəyişəcəklər. Lakin hər halda velosipedlər, skuterlər və digər alternativ nəqliyyat vasitələrinin sayının artması müsbət bir haldır. Burada əsas məqsəd mobilliyin təmin edilməsidir. Mobillik dedikdə biz şəhər mühitində hərəkətin hamı üçün sərbəst olmasını nəzərdə tuturuq. Velosipedlərin istifadəsinin artacağını tezliklə deyə bilmərəm, amma kiçik mühərrikli nəqliyyat vasitələrinin rolu artıq artıb”.
Ekspert əlavə olaraq bildirib ki, xüsusilə gənc vətəndaşlarımız elektrikli skuterlərə daha çox üstünlük verirlər: “Həmçinin, daşınma və çatdırılma xidmətlərində də belə nəqliyyat vasitələrinə daha çox üstünlük verilir. Zaman keçdikcə kiçik mühərrikli nəqliyyat vasitələrinə olan tələbat artacaq və bunlardan istifadə edənlərin sayı daha da çoxalacaq”.

Eltac Zülfüqaroğlu